પિતાનું મૃત્યુ, માતાના પુનઃ લગ્ન હોય તેવા બાળકોને મહિને રૂ.૩,૦૦૦/ મળશે

જામનગર
જામનગર તા.૩૦ સપ્ટેમ્બર :બાળકોના સ્વસ્થ અને સંતુલિત વિકાસ માટે કુટુંબ જેવો અન્ય કોઇ વિકલ્પ નથી.જેથી ગુજરાત સરકારના સામાજિક અને ન્યાય અધિકારિતા વિભાગના સમાજ સુરક્ષા ખાતા- જિલ્લા બાળ સુરક્ષા એકમ દ્વારા ૦ થી ૧૮ વર્ષના અનાથ અને નિરાધાર બાળકો માટે ‘પાલક માતા પિતા યોજના’ સમગ્ર રાજયમાં અમલી બનાવાઇ છે.
આ યોજના અન્વયે જે બાળકના માતા અને પિતા બંને મૃત્યુ પામ્યા હોય તેવા બાળકોને આ યોજનાનો લાભ મળે છે. જેમાં બાળકને રૂ.૩૦૦૦/- ની સહાય આપવામાં આવે છે.પાલક માતા પિતા યોજના’માં થયેલ નવા સુધારા મુજબ જે બાળકના પિતાનું મૃત્યુ થયેલ છે અને માતાએ પુન:લગ્ન કરી લીધા છે તેવા બાળકોને પણ આ યોજનાનો લાભ મળી શકશે. આવા બાળકોનું હિત જળવાય અને તેને સુરક્ષિત/સંતુલિત જીવન વિતાવી શકે તેવા હેતુસર સરકાર દ્વારા પાલક માતા-પિતા યોજનાનો સુધારો કરવામાં આવેલ છે. બાળકનો અભ્યાસ જયાં સુધી ચાલુ રહેશે ત્યાં સુધી જ આ યોજનાનો લાભ મળવાપાત્ર રહેશે.વધુ માહિતી માટે જિલ્લા અને બાળ સુરક્ષા કચેરી, ઓફિસ નં.૬૧, સેવા સદન-૪, રાજ પાર્ક, રાજકોટ રોડ, જામનગર, ૦૨૮૮-૨૫૭૧૦૯૮ નો સંપર્ક સાધવાનો રહેશે.
જામનગર જિલ્લામાં આવા કોઇ પણ બાળકો આ યોજનાના લાભથી વંચિત ન રહે તેવા હેતુસર જિલ્લા અને બાળ સુરક્ષા અધિકારી દ્વારા અનુરોધ કરવામાં આવ્યો છે.